早排雷神莫雷拉同方嘉柏曾於谷草聯手四喜臨門，近日則合作減少咗，好似今晚於谷草咁，佢哋僅以第二場五班1650米「通勝」一駒並肩作戰。
不過，跑馬從來貴精不貴多，「通勝」繼前次谷草五班一哩用雷神跑第二後，今場人馬重逢於同班同程再戰，沿途居中，直路後上一攻而破贏四分三馬位，此駒大熱打開今季勝門，單Win及組合獨贏A1分別派40及25.5元。
雷神剛周日在沙田馬場起孖連贏19個賽日，已打破去季他保持的連贏18個賽日香港紀錄。連同今場「通勝」在內，雷神進一步破紀錄連續20個賽日冇斷纜，難怪雷神賽後表現非常激動。至於方嘉柏繼剛周日以「勢必跑」爆冷捧走其士盃後，這晚再有馬贏，累積兩連勝。
方嘉柏表示，今仗步速很合「通勝」發揮，讓牠舒服地跟住前領馬跑，得以發揮出應有水準。
今場二、三名分別為「搖錢樹」及「野外桃源」，第四名則出現平頭馬，包括落飛馬「威德將軍」及冷門「心中有善」，四重彩有兩瓣派彩，各派四千多元。