澳洲籍騎師這晚於谷草延續旺勢，繼頭場有柏寶勝出霍利時馬房「金飯碗」後，第四場四班1200米再有潘頓為大摩馬房「海翡翠」大熱掄元，三歲馬首度初跑快活谷兼用新配搭，就此貼欄一放絕塵，今季第二次贏馬，單Win及組合獨贏A1分別派27.5及17.5元。
「海翡翠」同時見證大摩與潘頓呢對同鄉練騎，今季首次合作揚威谷草，此駒前仗由祈普敦大熱跑第三，再出換貝湯美除羊毛面箍更加三甲不入只跑第六，呢勻換上潘頓冇用任何附加配備，結果由開閘到衝線都係最快一駒，贏馬過程清脆利落，大勝4.5馬位，打破之前「真好漢」4.25馬位的今季贏最遠紀錄。
今場開出熱頭冷腳，二至四名都係冷門，當中韋達、蔡約翰合作馬「喜悅再來」後追第二，騎練季內初次攜手上名，三、四名分別為「同進」及「信是有緣」，四重彩派五萬四千幾。「海翡翠」落飛黨重注Win由5倍過外打至2.7倍，而「海翡翠」搭「喜悅再來」25倍啡燈Ｑ亦開出，落飛黨在此場WQ彩池收錢約2,200萬。