轉眼就到12月1日，今日亦係灣仔美國萬通大廈改名為「中國恆大中心」嘅日子。各位以後坐的士去萬通開會，記得改口叫恆大中心嘞；大家亦要做好心理準備，以後越來越多富有中國色彩嘅大廈出現。
華置（127）大股東劉鑾雄舊年將旗下美國萬通大廈以125億元，賣畀「鋤Dee腳」許家印旗下恒大（3333）。噚日幾間以美國萬通大廈作為辦公室嘅上市公司，包括華置、酷派（2369）、中國秦發（866）都發通告，指今日公司主要營業地點由「美國萬通大廈」變為「中國恆大中心」。
百幾億買幢樓番嚟，仲可以改用自己公司名，咁大件事，點都應該有舞獅或剪綵儀式啩，點知公關話乜都唔知。