天文台台長岑智明噚日同傳媒飯敍，提到明年底會開天文台官方facebook專頁。籌備一年，皆因台長想搵精通社交媒體嘅人管理，可以貼地啲咁同網民互動，屆時仲可以澄清坊間錯誤訊息。
政府部門嘅fb專頁周不時收到嬲嬲，台長因此問過警方意見，因為警方開咗fb後收到成堆嬲嬲，引述警方當時答佢「有人嬲即係啲post至少有人睇得明」，唔介意網民嘅負面留言，而台長都覺得同市民溝通係好事，所以百無禁忌。
台長仲大爆個人fb係自己管理，覺得同網民討論天文氣象好有趣，仲話曾經有網民攻擊佢，佢發現之前已經有粉絲用理論駁斥對方，似乎台長都幾得民心喎！