為吸引小股東望兩眼公司年報,新世界發展(017)同謝瑞麟(417)出名有心思,又走藝術風,又成班董事粉墨登場,可惜,呢類年報並唔係會計師公會評審嗰杯茶。
會計師公會噚日公佈今年度「最佳企業管治大獎」評審結果,今年有幾個組別嘅最高榮譽獎項從缺,中電(002)繼續蟬聯恒指成份股組別大獎。
大會審閱超過650間上市、私營公司及公營機構嘅年報,以及其他公開資料,定奪邊間公司嘅資料披露清晰詳盡,與投資者溝通透明度高等等。
公會會長張頴嫻(Ivy)特別提到,由於監管要求披露嘅資料越來越多,令公司年報越來越長,但有幾多人真係會睇得晒?散戶睇一兩頁都瞓着喇。
所以,大會特別讚有啲獲獎公司,識得善用圖表、Infographic幫助投資者理解公司運作。但新世界、謝瑞麟就榜上無名,咪即係話,公會唔係頒美術獎囉。