新濠博亞舊年開咗新濠影滙，但表現麻麻哋，搞到「小賭王」主席何猷龍要親自出手，睇番實旗下啲項目，仲特登「請神」嚟幫手㖭。話說兩年後開張嘅新濠天地第五棟酒店，就以古希臘「夢神」Morpheus，負責掌管人類睡眠同埋發夢。不過，呢個古老神衹個名，最為人熟識都應該係《廿二世紀殺人網絡》入面，帶主角Leo離開Matrix嗰個光頭黑人。
呢間中文叫沐梵世嘅酒店，個設計都好夢幻吓，用咗大量曲線嚟塑造成間酒店，係小賭王專誠搵建築大師、「曲線女王」Zaha Hadid設計。可惜她今年因病辭世，未能目睹項目大功告成之日。沐梵世自然有濃厚曲線女王色彩，酒店中間縷空設計，尤如石頭上天然的氣孔。仲特登造外露骨㗎，酒店內部少咗好多柱同牆，擺起位上嚟都靈活得多。項目人員介紹時話，因為採用大量曲面設計，所以工程好複雜，花嘅時間亦多。
無計啦，小賭王要喺澳門起地標，好似新濠影滙咁，大大個8字喺中間，嚟遠都認得佢間酒店。話時話，唔知佢啲口味係咪轉咗，新濠影滙同沐梵世個設計，同新濠其他酒店都好唔同，仲要啲窿一間多過一間，唔通關風水事？