隔牆有耳:聰聰大合照遲到被噓 - 李八方

隔牆有耳:
聰聰大合照遲到被噓 - 李八方

新一屆立法會議員噚日按慣例喺立會影大合照,同今年立法會開局一樣,過程騎呢。最終有61名議員拍攝。唔算高嘅民記元秋,噚日同黨友高佬何俊賢全程企最後排,結果俾前面嘅公民黨楊岳橋擋實,攝記忍唔住要叫佢企番右啲。
經常喺fb玩直播嘅建制派議員何君堯,合照其間突然掹部手機出嚟,再捉埋身邊嘅工聯會麥美娟一齊自拍。白鴿黨黃碧雲就打倒689心切,喺大會嗌1、2、3影相時,突然大嗌一句「梁振英下台」,可惜冇人和應。
但最激死人一班議員嘅係香港眾志羅冠聰,因為佢噚日又遲到,令原本已起身走人嘅田北辰,同影到腰骨痛要摸住條腰骨嘅毛孟靜都要返轉頭,最終羅冠聰亦向一眾噓爆佢嘅議員耍冧,完成大合照。

李八方
mailto:[email protected]