牙買加飛人保特禮拜一晚出席佢套紀錄電影《我係保特》（I Am Bolt）嘅首映。呢個活動喺英國倫敦萊斯特廣場嘅ODEON戲院搞，所以好多現役同退役英超球星好似係史達寧、比利連、法比加斯同埋皮利斯就有去捧佢場，但偏偏佢最愛嘅曼聯就冇代表出席。咁又難怪嘅，曼聯家陣喺英超落後榜首嘅車路士11分，周三又要同韋斯咸踢英聯盃，邊有心情同時間嚟參加保特嘅首映呀。
體壇名將紛紛撐場
講述史上最快男人保特嘅紀錄片《我係保特》將會喺英國上映，禮拜一晚先喺倫敦萊斯特廣場嘅ODEON戲院舉行首映，保特亦扮到好型仔咁出席；而係人都知佢係派對動物，行紅地毯嘅時候，身邊當然唔少得一班着到好閃嘅舞蹈員啦。話晒喺京奧、倫奧同里奧攞咗九面金牌嘅保特係體壇超級巨星，所以好多體壇名人嚟捧佢場，包括英國長跑好手法拉、英國三級跳名將愛德華斯、英國拳手希耶同埋德國網球名將碧加，以及一班英超名將例如係曼城翼鋒史達寧、車路士中場法比加斯、阿仙奴後衞蒙利爾、比利連、中場辛迪卡索拉、前鋒基奧特同名宿皮利斯等，絕對係星光熠熠；但係，佢最愛嘅曼聯就一個代表都冇囉。
「摩連奴盡快打畀我」
雖然愛隊冇嚟捧場，不過保特仍然好開心，仲話等緊曼聯簽佢。現年30歲嘅保特講笑咁話：「曼聯快啲簽我啦，希望摩連奴（曼聯領隊）會盡快打電話畀我啦，我真係好期待囉。」阿仙奴有咁多人嚟參加保特個首映，唔通想同曼聯爭？保特做唔做到紅魔暫時冇人知，但就做咗蜜蜂仔，皆因多蒙特早排證實，保特會去佢哋度進行操練。
保特講過玩埋下年喺英國舉倫敦舉行嘅世界田徑錦標賽就會退休。佢咁回應：「對我嚟講，倫敦世錦賽係一個好重要嘅賽事。我好鍾意倫敦呢個地方，所以喺度結束跑手生涯係最適合不過。」佢仲話，退休後會擺多啲時間做慈善工作㖭。