特首梁振英噚日出席立法會酒會，社民連長毛梁國雄係少數有去嘅民主派議員，不過長毛去就唔會係贈興咁簡單，佢仲帶埋兩碌濕柴送畀梁振英，明寸CY係一碌廢柴。不過CY好嘢，扮睇唔到、聽唔到，仲一直好好笑容，演技同面皮之厚，恐怕無人能及。
689扮聽唔到
話說今次係立會做主人家請梁振英，點知酒會前突然傳出政府準備向劉小麗嘅宣誓提出司法覆核，意味繼梁頌恆、游蕙禎宣誓案後，再摑當日幫劉小麗完成宣誓嘅立法會主席梁君彥一巴。難得梁君彥當冇事，喺酒會致辭時仲好意思話噚日係個好溫馨嘅酒會，仲搞爛gag話以前立法會通常係午宴宴請特首，噚日改成酒會，「因為立法會收到太多官司，現時budget唔夠，要攞晒啲錢去請大狀同律師」，話希望CY包涵，或者叫財爺畀多啲錢立會用！
長毛同有份出席嘅毛孟靜就冇建制派咁好戲，長毛準備咗一份《成報》插梁頭版準備狙擊CY，話「今次應該係689臨別前最後見佢，我要話佢知，佢係廢柴政府、大話特首、黨同伐異、官商鄉黑」，仲有兩大碌「廢柴」送畀CY，「廢柴即係條柴濕咗，燒唔着只會出煙，只會令人眼冤咁解」。
CY到場時，毛孟靜陪長毛喺門口大叫「梁振英下台」，長毛不停狙擊梁，大叫「廢柴下台，梁振英下台」後被大批保安驅逐，CY就留低同建制派密斟。
李八方
mailto:[email protected]