5年前梁振英角逐特首嘅時候，仲未入閘已經有幾單新聞，先有被指同「紅顏知己」明天更好基金行政總裁鄧淑德有密切關係，然後有DTZ被收購令人質疑梁振英生意失敗，5年前今日第3單新聞已經揭開序幕，就係2001年嘅如心廣場案。
八方噚日同大家提及過，今日再剖析一下。話說華懋同政府喺2002年，因為如心廣場工程延誤引發嘅罰款同補地價問題對簿公堂，當時係華懋證人嘅梁振英話，自己喺北京同前規劃環境地政司梁寶榮有過口頭協議，令華懋唔使被罰款同補地價。主審嘅高院暫委法官麥章智質疑梁振英供詞嘅可信性，形容係「根本難以置信」。當日本身係律師嘅民主黨何俊仁話，有法律界人士都覺得梁有呢單嘢喺身，誠信受質疑仲點選特首呢？但有北京欽點，梁振英最後咪又係做咗特首，而香港人就要忍受一個冇誠信嘅特首。