英國傳媒《BBC》喺周一公佈「2016體壇風雲人物」嘅16人候選名單，除咗加里夫巴利同占美華迪係足球員之外，其他14名候選人都係里約奧運或殘奧嘅冠軍級人馬，得獎熱門更加係網壇「一哥」梅禮（圖）。
巴利華Dee榜上有名
巴利喺上季歐聯決賽幫皇馬擊敗馬體會稱王，而且喺歐國盃帶領威爾斯歷史性打入四強，最終輸畀冠軍球隊葡萄牙；華dee就喺上季英超幫李斯特城爆大冷贏得聯賽冠軍，呢位29歲射手仲喺上季射入24球，喺金靴獎之爭只係以一球輸畀哈利卡尼。雖然呢兩位球星嘅成績都唔錯，但佢哋喺今年就未必夠一班代表英國贏得金牌嘅奧運選手鬥嘞。
梅禮今年成績極好，除咗贏得溫網冠軍外，亦喺里奧為英國贏得一面男單金牌，加上喺年終賽稱王，職業生涯首次成為年終一哥，所以佢係今年體壇風雲人物嘅頭號大熱（見附表），唔少人都認為曾經喺2013同2015年攞獎嘅梅禮，有望成為史上首位三度贏得呢項殊榮嘅運動員。博彩網站skybet仲將梅禮嘅得獎賠率列為1.17倍，同第二位嘅里奧三項鐵人冠軍A布朗尼嘅9倍都有一大段距離，得獎名單將會喺12月18日於伯明翰舉行嘅頒獎禮揭曉。