千億新抱徐子淇噚日34歲生日，噚日凌晨時分佢喺社交網大放閃光蛋，貼咗多張同恒基二少老公李家誠外遊嘅靚相，大晒恩愛，相中嘅子淇同老公着住白色情侶裝坐喺韆鞦上面，同老公深情對望。另一張就係李家誠揸開篷古董車，子淇仲不經意露出一條久遺嘅事業線。
揚言愛到老
四子之母嘅子淇，仔女一日一日咁成長，但係佢依然保持美貌同身材，佢喺社交網用英文留言：「我不介意自己老，因為有你陪我一齊老！」同李家誠已經係老夫老妻，但子淇喺生日再次對老公講愛的宣言，真係冧爆。
子淇06年下嫁李家誠，喺澳洲舉行世紀婚禮，婚後專注家庭，為李家開枝散葉，十年間湊成兩個「好」字。結婚第二年就生咗長女李晞彤，晞彤轉眼已9歲，之後係7歲嘅二女晞兒，5歲嘅三子俊熹，同埋14個月大嘅四子建熹。今年仲係兩人結婚十周年，佢哋一家六口早喺暑假已去咗美國度假慶祝錫婚，心情愉快嘅索爆人妻子淇，當時仲被影到連環啜爆老公。
撰文：馮仁昭
