八方相當年：
媽媽激發胡穗珊搞社運 - 李八方

啱啱過去嘅立法會選舉棄選九龍東嘅35歲工黨主席胡穗珊，向來畀人感覺好硬淨，係女強人一個，原來佢自幼已經係古靈精怪、包拗頸嘅男仔頭，一直畀人豪邁剛強感，難怪佢曾經講過，一唔笑啲人就覺得佢黑面。

胡穗珊係家中長女，佢話過投身婦女運動，係受到媽媽嘅遭遇啟發。佢話媽媽好聰明好叻，但當年由內地來港，只可以喺香港做車衣女工，佢覺得呢個社會對女性好唔公平，激發佢搞社會運動。

霸氣讀聖士提反

佢笑笑口話年中慳咗唔少買衫錢，因為細細個時，媽媽已經有好多「衫辦」攞番屋企，通常一式攞兩件，一件畀佢，一件畀阿妹，即使到𠵱家，阿媽退埋休，仲有途徑攞衫畀佢着：「阿媽話呢啲係邊際福利，因為車衣女工人工係好低。」
胡穗珊雖然喺勞工組織工作，但其實佢出身名校，佢提供一張喺聖士提反書院中六上化學堂嘅相，見到佢當年一樣咁霸氣。胡穗珊嘅同屆同學袁彌明喺邊？佢話讀中六時，袁彌明已經去咗外國讀書了。而胡穗珊都唔弱，幾年前攞咗獎學金，去咗英國華威大學攻讀性別與國際發展碩士。