爆出股東內鬨、賣盤大龍鳳嘅翠華（1314），噚日一班管理層包括主席李遠康，終於肯公開見傳媒，李遠康拉埋剛升職做董事嘅阿仔李祉鍵（Kenji）一齊影相。不過Kenji齋影相，業績會開始後，佢竟然坐入記者群入面，幫阿爸做啦啦隊。
問李遠康對Kenji有乜期望，可能傳媒問得太多有關股權爭拗嘅問題，本來好溫馨嘅話題，李遠康亦好官腔咁答，指董事局「唔止（增加）一個人，增加董事都係業務發展需要不同人才發揮，係有遠見同務實需求」。
其實，大家都明點解要安排Kenji入局。翠華本來五名創辦人，張偉強舊年辭任，何庭枝同張汝彪早前被踢出董事局，董事局得番李遠康同張汝桃，要補人當然係補自己人。
雖然翠華管理層唔多講股東內鬨詳情，但冇忘記幫公司賣廣告，仲話明年會搞婚禮套餐，又話要趕於3月、7月同11月呢啲婚展旺季推出，仲有新便當產品推出㖭。