立法會前主席曾鈺成「to run, or not to run」？以曾主席嘅聰明才智，點會咁易話畀大家知，所以𠵱家續係風花雪月之時，噚日佢喺自己做主持嘅電台節目《鈺成千里目》中更自爆同愛將、即係民建聯現任主席李慧琼喺1999年嘅相識經過，第一眼見到對方就覺得係「美貌少女」，𠱁到琼子冧爆講「多謝」。
現年42歲嘅琼子，當年25歲相信都卜卜脆，難怪師傅曾鈺成都印象難忘。當時仲扎根九龍西嘅曾鈺成話，民建聯喺1999年區議會選舉派咗好多新人落場，其中有位趙律師喺九龍城選，對方帶咗個「美貌少女」落區，會用紙筆記錄街坊對談，當時驚訝對方「咁pro（專業）」！
愛徒冇心肝 唔記得
聽到呢度都feel到，曾鈺成對愛徒有好深印象，但琼子就冇乜心肝喎，除咗唔多記得同師傅首次相遇場景，亦對做筆記冇乜印象，反而自爆當年參加關於生命提升嘅課程而識咗課程同學趙律師，應承幫手助選，點知趙律師不符資格未能參選，有人反而勸佢選。當時佢未入民建聯兼未有男朋友，父母勸佢做好會計師好過，但佢就覺得要趁年輕試新事物，結果上陣對戰九龍城區資深議員。結果係，佢做咗一個半月地區工作就win咗，係當時最年輕嘅女區議員。唔知有朝一日，會唔會係香港最年輕嘅女特首？
李八方
mailto:[email protected]