曼聯周日晚主場同韋斯咸踢成1:1，16年嚟首次主場聯賽四連和。領隊摩連奴仲「青出於藍」，首13場帶曼聯嘅英超成績仲衰過兩位前帥莫耶斯同雲高爾。
費格遜負責打造曼聯嘅輝煌紀錄，而佢啲接任人就負責打破恥辱紀錄，換咗三任領隊，睇嚟越換越差。周日對韋斯咸呢場，曼聯先被對手迪亞法沙高喺兩分鐘破門，雖然伊巴謙莫域之後追平，但曼聯下半場淨係識轟高波入禁區，進攻毫無章法，最終兩隊踢成1:1完場。真係辛苦晒班主場球迷，曼聯連續四場喺奧脫福踢英超都和波，上次主場咁頹已經係1990年嘅事，嗰陣菲爾鍾斯都未出世。
曼聯最大嘅問題係把握力差，呢四場包括對韋咸、阿仙奴、般尼同史篤城嘅聯賽，紅魔都係形勢佔優，合共91次射門，但最後入得三球。一場半場可以賴冇運，但四場都係咁，就相信唔係冇運咁簡單。
逼和韋咸 踢水樽被逐
曼聯中場保羅普巴喺上半場因插水被罰黃牌，領隊摩連奴嬲到震，一腳踢走場邊嘅水樽，今季第二次被趕出場。據統計，摩佬今季被逐次數仲多過成隊曼聯球員加埋。搵番莫耶斯同雲高爾教曼聯頭13場英超成績，發現摩連奴仲衰過佢哋，人哋攞得22分，但喺摩佬帶領下，曼聯家陣得20分排第六；同埋曼聯離降班區只差九分，仲近過同榜首車路士嘅距離。普巴同費蘭尼呢場都拎咗今季第五黃，周三對韋斯咸場英聯盃都要停賽。
巴塞作客皇蘇九年未贏過
除咗曼聯，巴塞隆拿亦喺西甲失威，喺美斯入波下作客以1:1逼和皇家蘇斯達。巴塞近年每次作客皇蘇都好似中咒一樣唔識贏，上次巴塞可以喺度贏波已經係07年嘅事。