下屆特首戰呢排開始有啲睇頭，梁振英雖然未表態，但搵咗死敵自由黨入行會，又現身唔同活動，仲要肯接受記者訪問，係咪轉咗性呢？
睇番5年前嘅噚日，佢正式宣佈參選，仲標榜嚟自基層，同日前去長者活動時話自己都會老，有異曲同工之妙。
當年梁振英嘅競選班底一出，大家不禁打個冷震，事關唔少人都係董建華年代嘅舊人。當日梁振英出嚟解畫，強調助選團絕大部份成員都唔會成為佢嘅管治班子成員，而且佢會用人唯才、用人唯心。
事實係點？當年做競選辦主任張震遠、羅范椒芬其後入咗行會，羅范仲做埋科技園公司董事局主席，曾任梁振英競選辦公室副主任嘅紀文鳳就獲委任為港大校委會委員，競選辦成員鄔滿海就成為長策會委員。而最終除梁粉陳茂波外，梁振英搵嚟吳克儉等任局長，真係「用人唯才」嘅創新演繹。