噚日喺高雄中學體育館舉行嘅ABL賽事，即使大會推出買一送一優惠，最後只得大約300名球迷入場。雖然當地試過用呢個場作為SBL（超級職業聯賽）等大型賽事嘅比賽場地，可惜噚日就唔多主場球迷撐場。
花絮︰聖徒打氣tee賣成嚿水
作為高雄首支職業球隊嘅高雄聖徒，有美國基督教電台注資嘅佢哋，希望可以喺高雄宣傳籃球運動。佢哋喺場館門口擺咗個攤位賣球隊嘅打氣tee（圖），價錢要一件500元台幣（約122港元），靚唔靚就見仁見智啦。
花絮︰台灣都有李琪fans
東方隊長李琪（左）唔止喺香港受歡迎，衝出亞洲去到高雄都有粉絲！喺李琪接受完訪問之後，有一位媽媽級嘅當地台灣人就帶埋個囝囝，要求同李琪合照，今場射入兩球三分波、有10分進賬嘅佢梗係冇托手踭啦。
