好幾位正職炒股嘅朋友最近大讚福臨門前老闆「七哥」徐維均所開嘅「家全七福」，自從今年中搬咗去灣仔華美粵海酒店之後，食物質素靚好多；華華早前走去食飯，分別見到盧覓雪、「六嬸」方逸華，呢度明顯已經成為「名人飯堂」。
福臨門除咗鮑參翅肚出名，唔少甜品亦相當出色，好似一道豆沙蘋葉角，就係華華最愛，七哥嘅家全七福亦有呢道甜品（45元一籠），呢度嘅出品令人有驚喜，口感軟糯滑溜，豆沙又唔會太甜，啱啱好。
至於中菜必不可少嘅蜜汁叉燒（150元），近年好多中菜館標榜用黑毛豬做叉燒，價錢收得貴，但質數參差。七哥呢度嘅叉燒冇標榜豬肉來源，但燒出微香，肉質嫩滑，拍得住國金軒嘅叉燒。
原先以為七哥換咗總廚，但其實又冇喎，呢度嘅總廚依然係跟咗七哥超過廿年嘅陳師傅，可能換個新地方，樓底高咗、寬敞咗，整體感覺都改善了吧。另一邊廂，福臨門失去「大劉」劉鑾雄呢個生招牌，唔知會否越來越感到受威脅呢？
