所謂「家家有本難念的經」，效力皇家馬德里嘅威爾斯國腳加里夫巴利，最近唔單止為自己嘅足踝傷頭痛，佢仲因為未婚妻艾瑪（Emma Rhys-Jones）嘅家人惹埋啲黑社會，搞到成日擔驚受怕，最新一宗就係有匪徒自稱擁有巴利四歲大女Alba嘅「不適當照片」，向巴利勒索100萬鎊（約980萬港元）。
黑幫話有阿女大麻相
巴利未婚妻艾瑪嘅家人，唔知點解個個都麻煩多多，艾瑪嘅爸爸因為捲入一宗高達一億鎊嘅連環詐騙案而踎緊監，而艾瑪嘅艷星表姐丁丁（Epiphany Dring）就涉嫌食毒販夾棍，夾走咗人哋一箱現金，搞到家無寧日，最後警方就發現原來箱錢係俾丁丁嘅阿叔攞咗兼拉咗個阿叔，真係一屋麻煩友。
不過就算呢件事告一段落，亦唔代表巴利冇麻煩，因為啲黑幫知道有巴利呢個金礦後，當然咬住唔放，最近佢哋又有「新搞作」，話手上面有巴利四歲囡囡Alba喺大麻旁邊嘅相，又話有Alba唱成人歌嘅片段；如果巴利唔交出100萬鎊，就會將張相同條片廣傳咁話。
警已報但仲好淆底
不過巴利冇向惡勢力低頭，佢同艾瑪已經報咗警，仲話Alba冇可能影過啲咁嘅相同片；連南威爾斯警方亦話：「我哋查緊一宗好複雜嘅案件，當中涉及威脅同恐嚇。」雖然巴利同艾瑪好似好堅定，但據知情人士指其實佢哋好驚驚：「一切都係嗰班販毒黑幫搞出嚟，佢哋想攞番之前箱錢嘅損失。其實巴利同艾瑪都好擔心兼好嬲，因為佢哋覺得自己好無辜，唔知點解會惹埋啲咁嘅人！巴利同艾瑪家陣已經加強咗自己同兩個女嘅保安，因為佢哋實在唔想有事發生。」