滙豐高層日日為錢博到盡，噚日就搞咗個社區節回饋社會，喺中環遮打道擺攤位遊戲，平時比較低調嘅滙豐香港行政總裁施穎茵（Diana），玩掟波遊戲時好童真，扔中之後又跳又叫，仲yeah咗聲（唔通佢細個冇玩過？）
澳門出生嘅Diana係中葡混血兒，舊年接任香港一姐呢個位後比較低調，噚日難得展現輕鬆嘅一面，玩一個好簡單嘅扔迷你欖球遊戲，只要中到個窿就贏，佢第一次扔唔中，無奈到手都震埋，扔第二次就命中，開心到揸實拳頭，然後做個V字手勢。
企喺佢後邊嘅商務及經濟發展局局長蘇錦樑亦好投入喎，認真做晒手勢教佢扔波，話「用陰力先扔到㗎，係咪啊？」高見。
Diana老闆、滙豐副主席王冬勝（Peter）同蘇局長經過一個攤位，亦同一班鶴佬人（即水上人）婆婆一齊跳「龍船舞」，婆婆同蘇局長一路打鼓，王冬勝就扮撐龍船槳，婆婆玩到唔肯停。
