【本報訊】自2003年離開港交所（388），伍綺琴與不同家族企業結緣，先後在恒隆地產（101）及碧桂園（2007）任職，兩位老闆都甚具個人風格。如恒隆陳啟宗就「好鍾意講嘢，有佢講冇人講」；碧桂園楊國強就不喜歡見人，兼「最憎打呔」。
中、港地產界向來是男人戰場，伍綺琴以往經常被標榜是恒隆數十年來唯一女董事，前中國首富碧桂園楊國強的愛將。在男人戰場打滾多年，伍綺琴指「女人都係鍾意靚嘢」，轉做零售個人「開心咗」，「樓盤貨尾無人住，一陣味；但𠵱家就連貨尾（鑽石、黃金）都係靚嘅」。
楊國強最憎打呔
伍綺琴直言以往老闆都是叻人，但「陳啟宗好鍾意講嘢，有佢講就個個人都唔會講」。碧桂園楊國強「就唔鍾意見人，內地文化係咁，全部坐係上面，（下面）個個聽聽話話，唔會有咁樣嘅dialogue（面對面談話）」。她要配合這兩位主席，行事趨低調。
伍綺琴承認，加入謝瑞麟後打扮會更花心思，更爆料指以往楊國強最憎打呔，「佢做地盤出身，根本唔care呢啲」，多番勸說才會繫上領帶。站在這位「不打呔主席」身邊，「佢好casual，你點可能扮到隻雀咁」。
但現時伍綺琴會陪伴公司的「御用模特兒」、行政總裁謝邱安儀出席記招：「佢係公主，我哋係丫鬟，拎住個扇撥吓撥吓嗰啲，唔好搶佢（鏡），又唔好失禮佢」，才能相得益彰。