澳洲騎師贏馬停不了，第十場三班1400米輪番到祈普敦威威，佢憑同鄉大摩馬房的11倍冷馬「人民武士」再下一城，組合獨贏A1派17.5元，個人連同第七場以12倍「勢必跑」（方嘉柏馬房）勝出其士盃，祈普敦全日起冷孖兼捧盃。
「人民武士」沿途守六七位，直路馬群中加速透出，以四分三馬位之先掄元，取得服役第四捷。今場頭馬可謂來得合時，皆因馬主自由黨榮譽主席田北俊，其黨友兼自由黨現任主席張宇人加入行政會議，為689政府做事，田北俊話明反對都冇用，昨日田少更在fb寫上「唔祇天氣寒，心更寒。大家保重。」如今「人民武士」苦等接近一年後重響勝鼓，田少個人可實收約50萬獎金，肯定可以俾番唔少人間溫暖田少，只可惜田少冇到場，由他人代拉頭馬。
雷神同蔡約翰呢場合作大熱門「爭分奪秒」，呢匹新勝馬末段從外叠發難一度出頭，以為可以連捷保持不敗之際，冷不防「人民武士」從中間穿上反敗為勝，「爭分奪秒」被迫屈居亞軍；三、四名順序係「美麗皇者」及「永勝神駒」，四重彩派一萬九千幾。