選委會選舉下月11日舉行，唔少獲確認參選資格嘅選委陸續公佈政綱，《香港01》翻查資料可見，最為人關注嘅四大地產商，包括長和、新地、恒地同新世界嘅家族成員，雖然唔少已經喺地產及建造界自動當選，但竟然有寫政綱，唔通藉此表明心迹？
不得不數係長和李嘉誠，喺地產界自動當選嘅佢連政綱都唔hea寫，佢話：「本人將竭誠選出一位熱愛香港、忠於基本法、有能力為香港人帶來希望及獲國家信任的行政長官，在一國兩制的框架下，帶領香港爭取最好的未來」。
郭基煇注重環保
其實李家一家挺唐，就算唐唐敗選後都冇轉軚挺梁；相比誠哥5年前嘅政綱，最明顯新增咗「有能力為香港人帶來希望」嘅條件，係咪可圈可點？
恒地主席李兆基同樣喺地產及建造界自動當選。佢4年前喺呢個界別自動當選時冇政綱，今屆就列明新特首嘅要求：「發展經濟，安定繁榮」，有啲行貨。
新地郭家今屆改由第三代郭基煇做代表，代替爸爸郭炳江喺地產及建造界參選兼自動當選。Adam嘅政綱係「解決房屋短缺，增加供應；促進環境保護，平衡發展」。佢爹哋上屆嘅政綱則係「推動環境保育，提昇社會質素」，似乎兩父子都好注重環保政策。
而上屆由挺唐變撐梁嘅新世界鄭家，鄭家純囝囝鄭志剛Adrian亦喺地產及建造界首次自動當選，政綱寫住「本人將竭誠為香港選出一位具領導才能、有遠見的行政長官，促進香港社會經齊持續繁榮發展，社會和諧安定」。唔知CY合唔合乎佢所講嘅條件呢？
李八方
mailto:[email protected]