記者小G因公事到一個泰國樓盤展銷會參觀，拿走一袋樓盤資料俾左丁山睇，小G話：「你成日去泰國，有無興趣買番一個單位呀，呢啲新樓盤資料或者啱你用！」新樓盤位於Sukhumvit（當地人譯作素坤逸），雖說位於熱門區域，但素坤逸路好長好長，有百幾條Soi（橫街），條大路嘅交通極不暢順，塞車係家常便飯，好彩沿路早有BTS（高架鐵路）可以疏導吓，但如果住在橫街，離開BTS車站遠嘅話，出入都幾煩。睇售樓書圖片就梗係正斗啦，但我地香港公司賣樓啲圖片，咪又係「法國海港風情」，同實景相差好遠嘅。
前星期泰國A夫婦回港與兩女兒及女婿見面，左丁山請佢地一家食飯，A太太就講起泰國樓，叫我地如果要買，最好買有落成單位（現樓）可睇嘅，買樓花就要好小心。A太太係泰國人，朱拉隆功大學畢業，係一位醒目女士，結婚時與泰國A在曼谷近郊買一間屋，入伙後就向發展商追討賠償一段時間（因部份貨不對辦），卒之幾乎要鬧上法庭，大業主先至肯和解了事。住在曼谷近郊係貪屋價便宜好多，負擔得起，但返工就慘咯，泰國A經常清晨六點已經要開車去曼谷，晚上回家要等到八點幾車龍漸散之後，夫婦每日疲乏不堪。現在有BTS，市區沿綫住宅梗係吊高嚟賣啦。
A太話曼谷有啲新樓嘅廚房與廁所係冇窗嘅，香港人一定唔習慣，買樓前最好先行實地視察，買現貨樓就唔會走眼。近曼谷馬場，離四面佛只有百零步嘅一個新樓盤就十分方便嘞，A太太推薦俾左丁山，但價錢梗係唔會便宜啦！到外國買樓，究竟有何目標，不出（一）移民，（二）做渡假屋，（三）出租當投資用途。如果上述三個功能都唔啱聽，買嚟做乜？
向一位投資移民顧問請教，佢話現時拜太多中國豪客移民所賜，移民熱門國家如美加澳紐英，比較困難，每一個國家都提高咗投資移民門檻，譬如英國，投資要高達二百萬英鎊，加拿大嚴限移民入境比率，已降低至百分之二至三嘅機會，美國最便宜，投資移民只需50萬美元，但特朗普新政府一定敵視移民，預料移民美國會有新困難。去東南亞又點呀？顧問大笑：「益我地公司代理賣樓，不少人話移民馬泰係得個講字嘅啫，最多係講講吓就在吉隆坡、檳城、曼谷買咗樓，我地公司代客買樓移民，一條龍服務，幾好生意㗎。早期不移民，現在先至搞，寸步難行，買番層海外樓以備急需嘞。」