梁特同財爺嘅特首相爭開始白熱化，其他疑似會跑嘅馬仔似乎已被拋離。但政治真係一日都嫌長，上屆都冇人估到，選戰去到大直路時又僭建又感情缺失咁多突變，所以阿爺名單上可以跑嘅人繼續做定熱身，話唔定趁機露兩手，選情會逆轉。
好似政務司司長林鄭月娥咁，人人話佢決定退休，但官到無求嘅佢繼續舉動頻頻。今日會應邀出席灼見名家傳媒舉辦嘅論壇，致辭題目係「香港新願景」，係咪可圈可點？論壇環節嘉賓仲包括其餘3位特首黑馬，立會前主席曾鈺成會同新民黨葉劉淑儀暢談「特首選舉與香港政局」，會唔會由香港大環境講到自身意向？真係值得注意。
前財爺梁錦松就會喺另一環節，同其他嘉賓分享中港經濟與一帶一路嘅睇法，簡直係開正阿松嗰瓣。唔知喺呢個論壇邊個會率先跑出？