禮賓府噚日舉行開放日，即係又係特首梁振英上演親民騷嘅好時機，所以佢呢，朝早出門前同市民見過面，晏晝5點前亦趕返禮賓府，再同遊園人士握手。嗱嗱嗱，好多記者圍喺梁振英身邊喎，但當然唔代表佢係好受歡迎，皆因唔少人都好想知佢到底幾時宣佈選特首，同財爺曾俊華明爭而唔使暗鬥？
關心CY嘅包括喺無綫電視做過記者嘅利君雅。利君雅係新聞界少數巴基斯坦裔記者、兼說得一口純正廣東話，一直好受網民關注。佢噚日問CY幾時宣佈連任，梁特未有答問題，反而關心做過大台嘅佢「去咗邊度（邊間機構）呀你？」，利君雅回答去咗《明報》，梁特再講：「唔見咗你（喺TVB）呀所以」。但對於一眾記者有關參選嘅提問，當然係笑住唔答咁走咗人。