上周六英超榜首三雄齊齊贏波，形勢仍然不變，車路士破熱刺聯賽不敗身，繼續做一哥。曼城險勝般尼之後，到利物浦主場出擊，有啱啱宣佈退休嘅謝拉特嚟捧場，但迎戰新特蘭都要踢到75分鐘，先由奧歷治打破僵局，到補時再由沙迪奧文尼博到12碼，占士米拿奠定2:0勝局。不過紅軍贏波代價大，菲臘比古天奴喺比賽足踝受傷，傷勢似乎好嚴重，但領隊高路普就話情況樂觀，要經詳細檢查先知。
車仔破熱刺金身
尾場車路士主場迎戰賽前聯賽不敗嘅熱刺，雖然喺開賽11分鐘失守，結束601分鐘不失球走勢，但之後有柏度洛迪古斯同域陀摩西斯各建一功反勝2:1，英超七連勝繼續坐喺榜首位。老帥哈利列納賽後依然撐佢曾經執教過嘅熱刺，話佢哋有最強嘅正選陣容，可以贏到今季英超。
