因為難得，特別珍貴，說的，不是愛情，而是藝術。在演藝學院戲曲學院，就有這樣一對好拍檔，26歲的John Cliford與24歲的蔡蔚珊，前者飄洋過海，由波士頓來港學戲曲；後者自幼入讀國際學校、英國名牌大學畢業，卻矢志傳承國粹。這兩個英文流利過中文的好同學，與一眾演藝同窗走出校園，自資在高山劇場踏台板，於昨天粵劇節演出經典折子戲，為推廣戲曲文化出一分力。
洋人難做幕前 改彈揚琴
「我係洋人彈揚琴」。說得一口流利廣東話的John，正在為蔚珊伴奏，一埋位就玩爛gag自嘲，惹來哄堂大笑。這對超級粵劇迷，台前幕後合作無間。John因洋人面孔，幕前演出無望，矢志做專業樂師；蔚珊的曲譜，曾幾何時註滿密密麻麻的英文拼音，仿似神秘武林秘笈，「冇辦法，粵曲嘅文本都係比較深嘅中文」。自小學小提琴的John，為幽怨的二胡樂聲神魂顛倒；蔚珊呢？就因為探訪老人院，與粵曲結下不解緣。
「啲老人家話想聽粵曲，就同妹妹一齊去學」。時年13歲的蔚珊，師承名伶文千歲和梁少芯。父母創立日經日本語學校，出生富裕的小妮子，小小年紀十八般武藝，除了日語流利，芭蕾舞一跳9年，「媽咪話學咁多唔同嘅嘢，係時間專注一樣」。父母民主，讓她選擇，結果這個番書女揀了粵劇，「後來師父移民美國，加上我又去咗英國讀大學，先冇再學」。人在異鄉，說句中文也難，遑論唱戲，但越難得越思念，大抵是天性。
「試過喺唐人街到處問人，知唔知邊度有得唱粵曲」。人生兜了一小個圈，2013年，倫敦大學語言系畢業返港，成績優異的她獲港大取錄教育碩士，同年演藝學院開辦首屆戲曲學士課程，初生之犢偏向虎山行，選擇與夢繫的戲曲再續未了緣。「爸媽都由我，只係叮囑我：決定咗就唔好後悔，要更加努力做好啲」。最好，是目標，也是她對自己的承諾。「好多人可能覺得粵曲過時，但喺我心中，係一定要落好多苦功嘅藝術」。
熱心向朋友推介，又義務將劇本繙譯為英文，讓外國人都可以掌握內容。而為爭取演出機會，除了高山劇場的演出，稍後更會在新光戲院舉行師生聯唱，「係師父（文千歲）退休移民之後首次喺香港嘅公開演出，特別有意義」。由13歲學戲至今，相距足足11年，「當年跟師父學戲嘅學生之中，仍然有演嘅基本上只剩番我」，自覺任重道遠的番書女蔚珊，一面認真的說。
■記者呂麗嬋
