今次沙田日馬戲肉係第七場一班1600米其士盃，結果全日大旺的澳洲騎師又發威，祈普敦、柏寶、羅理雅及史卓豐順序跑入前四名，祈普敦首次策騎方嘉柏馬房「勢必跑」即贏，人馬合作後發先至，爆12倍冷Win捧走本屆其士盃，組合獨贏A2派30元正。
「勢必跑」由資深大馬主蕭百君擁有，為五歲法國自購馬，是2014年法國打吡大賽第五名，之前在港三捷俱三班賽，包括兩場谷草一哩，一場田草1600米。今次乃本身在港初跑一班賽，竟有突破性演出，沿途守七八位，只衝最後百幾米，便於內叠以凌厲後勁追過本已雙雙突圍的「太陽喜喜」（柏寶）及「縱橫大地」（羅理雅），險勝頭位，方嘉柏兒子這天有到場打氣，賽後兩父子顯得非常興奮。「太陽喜喜」、「縱橫大地」、「好健康」順序獲二至四名，四重彩派三萬三千幾。
祈普敦上周日在沙田馬場不小心策騎被罰停賽兩期，下月11日國際賽日起生效，今次「勢必跑」捧盃正好幫佢補償損失。比較唔好彩是「太陽喜喜」騎練柏寶及賀賢，賀賢連續兩屆其士盃「豈等閒」、「太陽喜喜」都做二奶，而柏寶則唔能夠連同第二場贏「皇帝誥令」在內於今日賽事捧盃起孖。