我的法國前度擅於車天車地，十句之中無句真，歷年來只有一次令我衷心折服：某位嬌貴的仁兄講起去歌劇院聽華格納，「五粒半鐘，好辛苦啊」，前度瞄他一眼，冷冰冰反問：「有咩咁辛苦？閣下有份在台上演唱乎？」的確，就算舟車勞頓捱飢抵餓，花錢的大爺實在沒理由怨天怨地，除非是有人揸住支槍逼他觀賞完全不過電的演出（譬如那些又長又臭的打飛機式「改編四大名著」，哈哈哈），否則博同情的投訴悉數歸無病呻吟類。比起拋個身出嚟娛樂大家的表演藝術家，坐在天鵝絨沙發椅印印腳的觀眾太舒服了，儘管有時劇場不但偏遠而且座落滿街牛鬼蛇神的紅番區，教人質疑古訓「不入虎穴焉得虎子」或者不應該浪費在這種地方，普遍來說仍然不及踏台板危機四伏，毋庸為萬千星輝的電視台效勞也隨時粉身碎骨。
那天看《哈利波特和被詛咒的孩子》，在皇宮劇院度過了快樂無比的五個多小時，前後左右來自五湖四海的哈迷中場休息打成一片，互相交換大半年前網上搶購門票慘狀，舌底無不洋溢苦盡甘來，無端端發達的我當然不敢插嘴──兩日前路過順口一問便買到回流票，說出來大概會遭他們毒打。旁邊兩個妙齡女子，一個瑞士人一個意大利人，頃刻之間已經熟絡如多年老友，講起倫敦旅館貴到離晒大譜，住價錢較公道的民宿又提心吊膽，意妹立即公開她在青年旅舍的恐怖經驗：「瞓到半夜，忽然衝咗條醉酒佬入嚟，話晌酒吧溝女，跟人番到屋企至發現係個變裝皇后，家陣唔止嬲到爆而且谷到爆，指住我哋話，求其搵一個畀佢扑喎，你話嚇唔嚇死？」