大師兄森哥通知紐約退休賓架Y回港探親與掃墓，相約晚飯一聚。賓架Y在新亞經濟系畢業後就去咗紐約哥倫比亞大學讀MBA，香港同班同學有李國星與吳光正，畢業後在花旗銀行工作，後自立門戶搞旅行社專辦美國人訪華旅行團，時維1979年中國開放之初。旅行社生意好好，點知創業一年後就俾FBI請去問話，嚇咗一餐懵，後來生意做大咗，滿懷壯志意圖大事擴充之際，竟碰上89年六四事件，美國人不敢往中國旅遊，於是賓架Y變成旅遊Y之後，大受打擊，事業從頭再開始過。卒之又做番賓架Y，與朋友在紐約州創辦社區銀行。今日睇見中國內外旅遊之盛，唯有嘆一句係時勢造英雄，並非英雄造時勢。
森哥訂咗左丁山主場，沙田馬會凱旋廳，叫左丁山寫菜，定要令賓架Y回味再三，忘記紐約唐人街餐館咁講。要贏紐約唐人街，香港餐廳輕而易舉啦，不過森哥搵齊一共十人吃一餐，話明要食靚嘢，於是為佢訂咗凱旋廳楊師傅啲拿手好戲，爵士湯、澳洲東星天婦羅、泰式柚子沙律配澳洲和牛粒（可以配鹿兒島和牛嘅，不過幫森哥慳少少荷包啦）、招牌豉油雞（特製楊師傅豉油）等等，單尾係鮮荷臘味糯米飯。賓架Y在紐約難得一吃靚中餐，自然連呼好好，森哥、中貿林、賓架Y弟弟紡織Y（聯合校友）與校長L等亦食得非常滿意。估唔到賓架Y最鍾意食臘味，連盡數碗（細碗啫）糯米飯，唔駛打包就係靠佢。
君自紐約來，便問紐約事。賓架Y長嘆一聲：「特朗普本是紐約二流地產商，為人粗俗，性好炫富、冇人鍾意佢，我地個個投票俾希拉莉，估唔到特朗普仍然競選得勝，只能講，美國東西兩岸選民與中西南部選民豈止思想不同，直情似係來自兩個不同國家。以後四年我地有排辛苦，每日在TV見到特朗普就唔開胃！」咁就慘咯，仲要忍佢4年，但整體來講特朗普能有甚麼改變？賓架Y話：「大嘅改變多數冇，但呢度改少少，嗰度換吓政策重點，譬如修訂醫保法例，不再重視環保，向入口貨開徵關稅，對移民從嚴執法，處處令人不快，不便，總會有嘅。外交軍事等等大題目，國會必定過問，總統唔可以橫行，會處處受到限制。佢又用人唯親，想搞裙帶主義，好容易構成利益衝突，偶一唔小心，紐約時報華盛頓郵報就會砌死佢，我估白宮見習生特朗普任內必有大小醜聞發生，令佢不能收發自如。」好多人都係咁諗，又試睇吓特朗普是否可以順利做滿四年啦。