【本報訊】張東正，24歲，3年前科大BBA畢業，現時是名人食肆富嘉閣「尾鑊」，11月代表香港，出戰中餐烹飪世界錦標賽。熱廚房無年輕人願入，最高紀錄，返工兩個鐘即較腳，偏偏冒出個矢志學廚的高材生，不介意由劏魚洗菜做起。以為3分鐘熱度，卻一做3年。「呢度有我嘅夢想」。不介意3年又3年，9年計劃，邊學邊做，阿正堅定的說。
記者：呂麗嬋
入到熱廚房，人人忙碌，記者左閃右避，那邊埋首斬瓜切菜，這邊廂火光熊熊。那碟火腩XO醬炒腸粉，先滾油大火爆香腩肉，再摩打手加生抽、水炒香腸粉，4分鐘搞掂，香氣撲鼻。「夠熱又乾身，幾好！」師父在旁指導，穿起白色學徒服、拿起鑊鏟的阿正，一面緊張。「肯學，冇話唔教」。
劏魚洗菜 3年埋鑊
難得遇上有心人，由埋鑊實戰到管理廚房，傾囊相授。那管你是大學生還是文盲，在熱廚房，無分彼此，劏魚洗菜，由原材料加工的「水枱」，到負責擺盤出菜的「打荷」，今日埋爐拿起鑊鏟，阿正花了足足3年。
「我冇天份，一定要將勤補拙。」阿正謙虛的說。做大廚，開自己的店，是他的夢想。大學三年級的暑假，同學去大公司實習，要不周遊列國，他卻選擇在街坊酒樓做廚房，爭取由低做起的實戰經驗。「咩都唔識，一開工好似打仗」。現實世界，無人再視你為學生，無時無刻都有客人催單的熱廚房，比想像更熱。「中間落場，廚房啲叔叔姐姐都會好心勸你：做廚房好辛苦，有學歷就應搵多啲錢」。行行出狀元，大抵「講係咁講」。
香港人總是務實，大部份人心底都有一套價值觀：揸鑊鏟不及揸數簿、西廚形象較中廚高貴，搵錢多總比搵錢少強，但年少氣盛，愛食切雞多過鋸扒的阿正，卻深信粵菜無涯被低估。「𠵱家可能人工低，但會買到未來嘅機會。」日做12小時，爭取替更，在不同崗位工作，由阿一鮑魚、名人坊到富嘉閣，都是米芝蓮推介的頂尖粵菜館。「最初做水枱，負責處理食材，第一日已有機會處理東星斑，千二蚊一條，好擔心，反而係其他人叫我放膽做」。
由一條斑開始，夢想見雛型。「追夢？肯定係富二代！」在討論區，這種論調好普遍，出身基層的張東正，卻是例外。爸爸是搬運工人，媽媽是家庭主婦，有六兄弟姐妹的他，縱是孻仔，也食鹽知米貴，沒人打本讓你做生意，畀家用，是常識。「我讀工商管理，理所當然畢業後去商場打滾，或者搵個鐵飯碗也好」。不單父母，曾幾何時，就連他自己也是這樣想。只是畢業前師兄的一個問題，讓他反思想走的路：「80歲時，你會想你的生活如何？」
「我腦入面出現咗個畫面：我嘅孫子帶住佢啲朋友嚟我嘅餐館，同佢啲朋友講：我爺爺嘅炒飯好好味㗎！每次一想到呢度，就忍唔住笑出嚟。」埋藏心中的學廚夢，隨着畢業期逼近，越來越熾熱。「記得小時暑假的一天，六兄弟姐妹一起吃着媽媽煮的湯麵，我就佔着家門，迎着從屋村吹來的午後涼風，享受我的碗中麵。這碗海鮮味的出前一丁，伴着菜心雞蛋和幾塊鮮切的肉片，就是那時候我最幸福的味道」。自小愛下廚，阿正說，有關飲食的回憶，在他心中，統統很美好。
媽媽炮製的那碗出前一丁、在科大讀書時為宿友炮製的乳豬公仔麵，還有師兄開放家中廚房，讓他與大班同學邊煮邊談邊食的快樂廚房。他心中理想的餐廳，除了美食，還有感情。「希望以食物同背後嘅故事，影響更多人。」走進廚房，犧牲不少：穩定的工作、大時大節親友相聚的時間，但他說仍然值得。「我哋成日叫廚房佬，覺得佢哋好多壞習慣，食煙賭錢，但我好好彩，遇到嘅都係畀好多機會我嘅好師傅好爸爸」。
大學生的身份，惹來「玩玩吓」的質疑，但也為他贏得更多意料之外的機會。「只要你用心認真做，身邊人一定會改觀」。就是父母，也由當初的擔心和反對，變成無限量支持。「我話試一年先，邀請佢哋嚟我工作嘅地方，試食我煮嘅嘢」。向父母耐心解釋自己的想法，又為自己定下9年藍圖，按部就班。「3年學好基本功，再下3年鍛煉好廚藝，吸取營運知識，最後3年希望可以搵到好拍檔，開一間餐廳」。11月，他更代表香港到北京參加2016中餐烹飪世界錦標賽，初試啼聲。
「唔一定人工高係成功」
富嘉閣旁的政府合署，是AO、EO的培訓基地，起薪點3萬的鐵飯碗，他並不羨慕。「一份工，至少要做到60歲，我希望呢份工，我係真心鍾意」。他說：「唔一定人工高就係成功，我希望為世界帶嚟一啲改變」。重新演繹「廚房佬」的角色，實踐「錢唔係全部」的求職選擇。「夢想無分大細，就算只係每日彈一個鐘琴；堅持日日抽時間，同阿媽食一個早餐，只要係你好想做嘅嘢，踏出第一步去做就是」。敢夢敢想，過來人如是說。
