天氣漸冷，沙田馬場十分空曠，早上更是寒氣逼人，騎師們都包到實操馬，但初來甫到的愛爾蘭年輕好手莫艾誠，十零度真係濕濕碎。這天所見莫艾誠不但冇長袖衫，甚至連個袖都冇，只穿背心現身，真係服咗佢。
在空檔時，莫艾誠同鄭俊偉黐到實一實，莫艾誠耷低頭細心聆聽，似在思考搏殺戰略。周日(27日)沙田賽事，兩人只合作一匹第三場四班1000米直路賽的「飛躍成功」，話題自然涉及此駒。「飛躍成功」乃直路賽專家，今季三戰此程得一亞一季，上仗落第亦只輸兩個半馬位，狀態穩定，如今45分比對上一次贏馬時低19分之多，6歲馬未算老，隨時成為莫艾誠在港開齋馬。