【本報訊】「間屋係我一磚一瓦捱返來，無論如何我都要攞番！」娟姐一夜間被騙去700萬元安樂窩，終日以淚洗面，由於現已報警，財務公司突然暫停追收首個月的利息，娟姐一家暫時保住單位，但物業已遭釘契，擔心被收屋。
娟姐半生坎坷，17年前丈夫因病離世，遺下當時只有3歲及9歲的兒子。「當年社署社工叫我申請綜援，留家照顧兩個仔，但我覺得自己有手有腳，可以自力更生，所以拒絕」。娟姐回憶這段寡母婆湊大兩兒子的日子，箇中辛酸不足為外人道。
沙士買樓 去年供甩
「朝早6點就出門，一日做到黑，大汗叠細汗，一路做一路流眼水」。身兼父職的娟姐，做過酒樓、清潔、美容等等，支撐到家庭開支，卻換來無時間與兒子相處，令她抱憾至今。
2003年沙士襲港，樓市插水，娟姐將積蓄及向親友借來的金錢，購入深井的一個600呎面積單位，「自己唔捨得食，唔捨得使，就咁慳慳埋埋供咗12年，終於舊年供甩，啱啱先至唞啖氣，跟住就收到咁嘅（詐騙）電話」。如今物業被騙，一家三口隨時無瓦遮頭，令娟姐徬徨不已。
■記者張 軍