喺選舉論壇上以答非所問而一鳴驚人嘅新民黨立法會議員容海恩（圖），上任後繼續發揮「不如你話畀我知吖」嘅精神，八方同事噚日喺立法會做嘢時咁啱同佢同𨋢，容好親切咁問𨋢入面一位政治版行家去邊，行家答「去9樓有個記者會呀」，容議員唔知係無知定可愛，問行家「記者會？……乜記者要開會㗎？」
八方同事形容當時大家都呆咗，難得行家好禮貌咁解釋，「即係……有個記者招待會」，容議員「哦」咗一聲就出𨋢，其間同事竭盡所能忍笑，將尷尬減到最低。可能容議員喺外國讀過吓幾年書，就變咗番書妹唔識中文啩，唔知平日佢黨友約佢一齊開PC，佢會唔會以為係開私人電腦、又或者去搵差人呢？