立法會內會噚日討論「西環契仔」謝偉俊提出，要求譴責同取消熱血公民鄭松泰議員資格的議案時，唔少民主派議員都鬧泰博早前走向建制派座位，倒轉疑似「國旗」同「區旗」係「小學雞」行為，點知社民連長毛梁國雄借勢鬧埋成班建制派係雞，但最神奇係，建制派因為咁，竟然要將個「雞」字定為「非議會語言」，唔畀開會講個雞字！
琼子裁定雞字冒犯
八方唔知長毛係咪早排聽得網上「雞，全部都係雞」神曲太多，定係上高登睇到巴斯光年幅「雞，全部都係雞」嘅圖，佢喺會上聽完建制派講嘢後，就好大聲叫咗句「建制派議員全部都係雞！」長毛嘅說話令到麥美娟大感不滿，要求內會主席「琼子」李慧琼裁定長毛言論有冒犯性。
點知長毛之後唔理琼子警告，解釋自己係指建制派「博士雞」，即係「高級過小學雞」，琼子見長毛唔理佢梗係嬲，即時趕佢出會議廳。民記陳克勤喺長毛被逐後，仍然好介意被指係雞，話雞字喺廣東話，另一層意思係「妓女」，要求琼子裁定雞字係「非議會語言」，但白鴿黨尹兆堅就立即駁佢，話雞只不過係家禽，早排自己健身時，一日都食五百克，亦唔會歧視性工作者。
一眾議員爭辯後，琼子細細聲問旁邊秘書:「佢（長毛）係咪有講呢句？因為我聽唔清楚」，之後就喺單靠建制派議員引述，裁定長毛表述方式有冒犯性。咁立法會以後討論家禽問題時，莫非連雞字都要禁？
李八方
mailto:[email protected]