經常自稱樂意與學界交流嘅教育局局長吳克儉，周四晚突然喺facebook貼文「爆seed」，點名鬧團體「關注學童發展權利聯席」會面時節外生枝，遲到、無按既定安排開會、無提出實質意見等，又話佢哋只係一直拍攝錄影，仲臨時要求增加人數同轉移場地，「原本一次約好的會面，一次好好的交流，為何會節外生枝？」
聯席：教懂我們官威
聯席之後喺fb回應事件，講出事件另一版本。佢哋話會前半小時已抵政總，因多咗9名青年想列席旁聽，結果遭百般刁難，佢哋呆等半個鐘，靜候吳克儉嘅恩准但無結果，最後9個代表入去對談，邀請局長落去見青年兼收意見書，但最終被拒。聯席話雖錯失同局長交流機會，「但幸好，我們能保持我們的尊嚴，維護我們對年輕人身份的尊重」，今次令佢哋「切切實實感受到局長對年輕人的重視」，更揶揄吳「謝謝你今天教懂我們何為官威，何為尊嚴，我們將銘記於心。」
其實聯席fb一直有實時更新事件，八方睇番當日直播代表見局長嘅片，吳同成員交涉時講啲嘢都幾哽耳，好似「嗱，𠵱家少過25分鐘㗎咋，我𠵱家咪喺到囉」、「快啲啦好唔好，我好有誠意聽你哋講嘢㗎」。八方就覺得無論事件誰是誰非，堂堂局長喺fb開名話人，做法真係好小學雞；最後有人問聯席做乜唔po個回應去吳克儉fb，哦，因為佢個fb無開放俾人留言囉。