兩年一任嘅民主黨主席又係時候換屆，離開咗議會嘅劉慧卿唔再參選，後繼何人呢？民主黨胡志偉噚日正式宣佈落場，其實志偉上屆都選過，但敗咗喺卿姐手，今次再參選就要處理黨政分家嘅問題，志偉強調，佢會盡力做好分家「最後一里」嘅工作。
志偉噚日連同現任民主黨副主席羅健熙（Monkey）出嚟宣佈參選，Monkey坦言佢都有意思選主席㗎，不過考慮到要實行黨政分家就要修改黨章，而要修改黨章就要有3/4黨員支持，難度好高，佢相信志偉比佢更加能夠爭取黨友信任，於是都係競逐番副主席，然後全力支持志偉。志偉亦補充，除咗Monkey外，現任民主黨秘書長李永成會角逐另一個副主席職位。其實上次民主黨主席有4個人參選，雖然到噚日為止只得志偉一個表態，但上次佢都係最後一刻先參選，今次唔知有冇程咬金呢？