5年前今日嘅特首選戰相當精采，話說唐唐趁住落區順勢宣佈參選，擺明截梁振英糊。而梁振英就隔空話「蠢人做特首，同社會大眾諗法唔一致」，然後仲自誇自己「落區廿幾年到今日，冇人向我掟過一張紙」。咁就得戚喇？今日梁振英何止俾人掟紙，連杯都俾人掟過。
與此同時，挺唐嘅影星周星馳亦公開表態，仲幫唐唐解圍話「其實蠢嗰啲人，我唔會同佢做朋友嘅」。就連全國人大常委范徐麗泰亦企出嚟畀說話梁振英聽，因為梁振英一直唔回應全國政協副主席、前特首董建華係咪會幫佢站台，范太話阿董貴為國家領導人，唔相信阿董會喺特首選舉提名期為某啲特首候選人助選，仲話阿董係老實人，唔希望有人擺阿董上枱。
而當事人唐唐亦連消帶打話唔評論梁振英應否請阿董站台嘅問題，只係話「我自己唔會擺任何人上枱」。至於梁振英似乎知道自己理虧，於是使出佢嘅語言偽術話，自己「冇講過董建華先生支持我參選特首」。