選舉常客胡世全（圖）屢敗屢戰，本身係民建聯成員嘅佢，2010年為咗參加立法會補選而退黨，之後到2012年更挑戰特首選舉，但連一個提名都拎唔到。現年57歲嘅胡世全噚日又宣佈參加明年3月嘅特首選舉，仲話自己早在3年前已經準備，成立個商業聯盟識到唔少商界中人，加上佢係基督徒，估計可以爭取宗教界、工商界、地產及建造界嘅票喎。
佢簡單政綱只有3點，推行「富人思維」提升市民學習理財之道、人際關係等，為咗教港人點理財，講明一旦當選會全民派1萬蚊；第二就係提升全民健康，提倡多菜少肉、運動同武術；第三就係推全民退保，但佢嘅方案要設資產審查，但講唔出幾多資產先有得拎，總之合乎資格就派5,000至1萬蚊啦。至於班底，佢話喺現有公務員同問責班子中擢升，有咩心水就冇講。
胡世全出身民建聯，但佢以非建制派自居，因退黨之後唔屬於建制派喎。噚日記招唔見政界猛人撐場，但立法會前議員黃成智有現身，佢話只係以《見報》記者身份嚟採訪喎。