肥彭來港，又係左報出動嘅時候，左報千祈唔好漏咗美國駐港總領事唐偉康呀，否則英美勢力又再出擊就未能繪影繪聲喇。唐偉康趁噚日係美國感恩節，喺facebook教大家整感恩節美食蘋果批。唐偉康喺屋企教人焗批，唔知會換嚟乜嘢滔天罪名呢？
唐偉康好認真，着晒圍裙教大家搓餅皮、切蘋果，仲話畀大家知，美國前總統林肯將感恩節變成公眾假期，等大家可以齊齊喺屋企慶祝，唐偉康仲騷咗同屋企人合照出嚟，但就冇逐一介紹係邊個。
唐偉康賣果讚果香，特登介紹自己用嘅青蘋果係嚟自美國華盛頓州，非常好味咁話。個批焗好後，佢仲用廣東話同大家講感恩節快樂。