雖然𠵱家已經有兩個人表態參加來屆特首選舉戰，但選情相當奄悶，事關好多嘢都只係喺枱底進行。不過5年前嘅今日就相當激烈，因為梁振英當日發出以「D Day」為代號嘅新聞稿，宣佈即將舉行參選大會。
D Day一詞係軍事術語，意思係發起行動嘅日子，估唔到梁振英嘅好戰特質早就暴露咗出嚟。當日佢大力反擊獲多位重量級金融界人士支持嘅唐唐，表明自己絕唔會受呢啲事影響，仲話「我哋抱住極大信心去做好自己嘅選舉工程，爭取所有選舉委員支持，爭取全港社會支持」。講得好，佢最後只係爭取到689位選委支持，香港社會方面，大家可以自行睇吓各大民調。
689仲搬全國政協副主席、前特首董建華出嚟，先唔否認老董為佢站台，又話老董非常關心佢，希望日後繼續得到提點。事實係老董最後根本冇為佢站台，連人大常委范徐麗泰亦不點名叫佢唔好擺老董上枱。