有外國品牌搶高舖租，第一份租約未完便打退堂鼓，體現舖租市場由消費者主導，理得你品牌有多出名，消費者嫌棄時便要轉型。不少港產零售品牌有起有跌，食店也一雞死、一雞鳴，呢頭有食店執笠，嗰頭有其他同業開番檔，香港人始終鍾意試新嘢！
四大零售品牌包括Coach、Gap、Forever 21和上周宣佈放棄中環舖唔玩的A&F，全部在四、五年前搶高原有舖租，踢走其他老字號，進佔一線區。話就話碰上零售寒冬，其實只是藉口。消費者口味轉變，這些品牌先後退出在香港的旗艦店，也要改變經營模式滿足新消費者的習慣。
內地開發商一個又一個進佔香港賣地場，一幅又一幅地皮創新高價，遠遠超越本港發展商的極限，正如本地龍頭發展商話齋，根本計不到數，賣地染紅已經走唔甩，呢個係事實。至於一直處於龍頭位置的港產金行，亦開始受到內地同業威脅，有逾百年歷史的老鳳祥和周六福已經先後在港開業，前者同樣以高租金踢走舊租客的市場策略，進佔尖沙嘴和旺角等金行傳統集中地。
本地零售商同樣面對經營成本上漲影響盈利的問題，要削減舖租成本選擇性離場，但這個最後防線都隨時失守，被內地零售商入侵一線舖，如利郎和柒牌等內地著名品牌，他朝也有機會在中環或銅鑼灣等最貴街道出現。
劉兆昌
資深地產傳媒人
http://www.HKLau.com
本欄逢周五刊出