有壞孩子之稱嘅對沖基金Elliott，批評過李國寶做主席嘅東亞銀行（023）董事局大部份係自己人，今年中仲狀告東亞配股條件對股東不公，案件明年4月正式開審；喺雙方開戰前，噚日竟然有位真．獨董駱錦明辭職唔做。
今年73歲嘅駱錦明，做咗東亞獨立董事約11年，佢本身係台灣銀行家，喺台灣金融界有江湖地位，連Elliott都話佢係真正嘅獨立董事，點評東亞事務唔會有利益衝突。
信置富三代接任
駱錦明忽然辭職，解釋係希望減輕工作量，投放多啲時間喺其他業務。佢同時卸任東亞提名委員會委員一職，由信置（083）第三代接班人黃永光兼東亞獨立董事接任。
東亞與信置兩家嘅關係應該唔錯，事關黃永光做東亞獨立董事嘅同時，李國寶大仔、東亞副行政總裁李民橋亦係信置獨立董事，東亞又係信置其中一間往來銀行。
提名委員會嘅作用，主要就董事、行政總裁、高層管理人員任命提出建議，黃永光接替駱錦明坐入呢個委員會，唔知有冇深層意義呢？
查實東亞近年俾Elliott鬧董事局大部份係自己人鬧得多，都有出手提升董事會嘅獨立性，例如今年初就搵嚟立法會前主席范徐麗泰做獨立董事。但留意番，李國寶曾任立法會議員好多年㗎。