末代港督彭定康噚日返嚟香港喇！1997年揮手道別之後，今次肥彭嚟香港幾日，噚日下午同夫人彭林穎彤（Lavender Thornton）同行，但就唔見令人懷念嘅3位千金。肥彭抵港，即刻好識做咁講咗句返到香港真係好（It's really nice to be back in Hong Kong），真係聽到都開心呀！
曾鈺成避嫌缺席論壇
肥彭嚟港其中一個目的係出席星期六嘅「香港管治：禮崩樂壞？」論壇，噚日仲係由論壇主辦機構負責人陳方安生接機，佢將會喺論壇同余若薇、馬世民同馬斐森對談，話講者中有佢認識同好尊重嘅人，又話論壇係好好嘅機會畀大家理性交流意見，仲好識做話對論壇好期待㖭。
呢個論壇原本仲有立法會前主席曾鈺成做講者，但曾鈺成早前自爆俾人向北京告狀而要缺席，由立法會前議員余若薇補上，不過，肥彭話無論邊個擔任講者，佢都會好高興咁喎。
今日肥彭會先出席外國記者協會午餐會，討論國際最新形勢，包括英國脫歐同特朗普當選美國總統等議題，下星期一去港大學生論壇講大學管治，佢做港督時做過香港多間大學同大專校監，在任期間尊重院校自主，各院校甚少出亂況，同現任校監梁振英嘅作風大相逕庭。
李八方
mailto:[email protected]