麗新集團太子爺林建岳近年計劃喺澳門隔籬嘅橫琴島，興建一個主題樂園度假村項目，呢個叫「創新方」嘅項目，官網啱啱開張，入面有晒岳少嘅發展藍圖。
項目一直標榜高科技，所以入面兩個主題遊樂場「獅門娛樂天地」同埋「國家地理探索」，都會用VR同AR技術，畀大人細路有得親身感受吓電影《飢餓遊戲》、《吸血新世紀》，同埋大自然場景。
網站內概念圖片相當精緻，落成後實物如何就拭目以待。之但係，呢個「創新方」入面，有啲設施好似唔多夾個高科技主題。好似入面有個「婚禮體驗館」，唔係畀人感受婚禮經驗，只係搭建場景，畀人影婚紗相，又或者喺度擺酒咁啫。仲有一個「美容及體檢中心」，顧名思義，畀人扮靚囉，扮到幾靚就人人唔同嘞。