阿仙奴今屆歐聯又跟足劇本走，周三主場同巴黎聖日耳門（PSG）踢成2:2，雖然同PSG同分但對賽成績較差排第二，連領隊雲格都話九成會次名晉級，16強分分鐘又要硬撼巴塞隆拿、馬德里體育會或祖雲達斯呢啲勁旅。
伊禾比擺烏龍
阿仙奴已經連續六屆喺歐聯16強出局，真係唔知幾時先可以突破呢個關口。佢哋同PSG周三賽前同得10分，所以呢場係爭奪小組首名嘅大戰。作客嘅PSG先由卡雲尼建功，但兵工廠憑基奧特喺完半場前射入12碼追平。60分鐘，艾朗藍斯嘅射門好似波子機咁，先省中堤亞高施華再撞到馬高華拉堤入網，阿仙奴領先2:1。
如果維持呢個紀錄，阿仙奴就可以排榜首，點知喺77分鐘，PSG嘅盧卡斯洛迪古斯接應角球頭槌攻門，搞到伊禾比擺烏龍，最後兵工廠失咗呢個作客入球，兩隊踢成2:2。儘管阿仙奴同PSG一樣有11分提早出線，但PSG對賽成績較佳，所以排榜首；PSG主場嗰場兩隊踢成1:1，而呢場就2:2，所以PSG就多阿仙奴一個作客入球，對賽成績秤先啲啲。如果PSG喺尾輪贏盧多格德斯嘅話，就算兵工廠炒到巴素利100:0都係得次名。
或鬥巴塞、馬體會
如果阿仙奴次名晉級，就要對其他小組嘅首名，例如巴塞、馬體會同摩納哥。如果抽到對巴塞、馬體會呢啲，真係九死一生喇；就算摩納哥好似弱啲咁，佢哋喺2014/15球季都喺16強踢過兵工廠出局。就咁睇形勢，撇除同為英超嘅李斯特城，最弱嘅小組首名應該嚟自B組，家陣由賓菲加、拿玻里同比錫達斯爭緊。
雲格就叫大家從另一個角度去睇，其實次名出線都唔係太差，咪成功避開到拜仁慕尼黑囉。雲爺爺話：「我哋希望得首名，但有九成機會以次名晉級。不過，首名就一定好咩？我諗要到抽籤嗰陣先知，因為你睇吓其他組形勢，真係唔知首名係好定壞。我覺得首名出線嘅唯一好處係16強次回合喺主場踢。」另外，阿仙奴傳統有個黑色11月魔咒，但暫時佢哋表現尚算OK啦，今個月四場不敗，嚟緊佢哋聯賽會對般尼茅夫，今月壓軸會喺英聯盃對修咸頓。