紅褲子出身的徐雨石設廐從練以來，出名作風明朗，成績一直穩居前列。這晚谷草第六場三班一哩，呢位本地練馬師靠郭能操刀勝出冷門「勁嘉輝」，取得個人從練第400場頭馬，而出名難贏的「勁嘉輝」亦告打破齋缽，單Win及組合獨贏A3分別派136.5及27元。
徐雨石賽前連續兩個賽日冇馬贏，這晚以「勁嘉輝」重響勝鼓，多少令人感到意外，事關「勁嘉輝」之前23戰7亞4季未贏過，是全港入Q次數最多的處女馬，令唔少長期追捧佢獨贏的馬迷感到洩氣。呢次換上以往從未騎過的郭能，沿途近乎殿後，末段沿欄直上，極之窄位劣勢下，以頸位驚濤駭浪衝贏所有外側對手勝出，本身爆冷初嘗勝果。郭能這晚交足功課，贏晒兩匹首次由自己策騎之馬第四場「笑眼光」及第六場「勁嘉輝」，個人季內首度於谷草起孖。
徐雨石表示，「勁嘉輝」今場頭馬贏在郭能成功走內欄慳位而上，發揮出色，並很高興終為馬主取得頭馬。呢場二至四名順序為「美麗鉅星」、「紅運精彩」及「爪皇烈焰」，四重彩派一萬五千幾，三T有人中正獎，每注派35萬幾。