想搵個好教練，除咗喺好成績嘅球會撬牆腳之外，仲可以留意吓帶開國家隊嘅教練。今年都有幾位喺國家隊表現出色嘅主帥跳番入球會，例如西維爾教練森柏奧利（圖）。
森柏奧利本身喺南美有啲名望，教過多支南美球會，但喺歐洲就寂寂無聞，直至2012年底佢接手智利後，全世界都開始識佢。接手嗰陣，智利世界排名26位，隊波喺佢帶領下舊年贏得美洲盃，候選年度最佳教練。當森柏奧利喺今年初離任嗰陣，智利世界排名第五。作為幫智利重振雄風嘅功臣，森柏奧利得到唔少歐洲球會招手，最後佢揀咗西維爾。
西維爾其實幾惡教，一嚟前任艾馬利太成功，幫球隊做咗歐霸盃之王；二嚟西維爾出名球員變動多，加美路、基祖華克同班尼加呢啲上季主力走咗，今夏又簽咗一大堆人返嚟，例如卡尼維達、拿斯尼、韋圖同甘素。不過，森柏奧利功力深厚，靈活運用3-4-2-1同4-1-4-1兩套好唔同嘅陣式，谷番起喺曼城鬱鬱不得志嘅拿斯尼。
成績方面，西維爾似乎挑戰到馬德里體育會嘅地位。馬體會近年係西甲第三勢力，但今季俾西維爾蓋過。家陣西維爾坐緊西甲第三位，只落後第二嘅巴塞兩分，同埋西維爾上月聯賽以1:0擊敗馬體會，都好有象徵意義；森柏奧利仲拎埋上月西甲最佳領隊。小弟季初擔心西維爾會有一段動盪期，但暫時唔單止冇動盪，森帥仲將球隊帶緊上另一個層次。
文：咖喱